飛神以文為樂: 二零一八清明遊︰花蓮五十小時(一)

「飛」於我來說是一種治療。今年第一季竟然沒有飛，渾身不自然。好不容易等到一個短得可憐的假期，讓我們可以出走一下。原本打算重遊台北，但機票貴過飛日本，唯有再搵。諗起我有個blogger小學同學，成日去花蓮，快快手查機票，時間可以，又唔貴，就去花蓮。

我今次住既地方叫「花蓮日日」，在花蓮市區金三角的一條小巷。多謝我位小學同學小V，臨急臨忙搵到間好方便又舒服既民宿，仲要free upgrade左做大房。

(請支持小V的網誌︰http://www.travelwithv.net/)

今次我們早有心理準備，要一嚐台灣麻辣鍋。然後當然問下谷歌大神邊間火鍋好，找，在民宿沿中正路向花蓮火車站走十來分鐘，在麥當勞前轉左，來到在台灣份屬巨頭的「問鼎」。「問鼎」樓高兩層，裝修不錯—外面有氣勢，內裡夠中華。

湯底可選三種︰麻辣鍋、酸菜鍋和養生鍋，可以雙拼。(後來從他們的網頁知道有五種……)那不用多想，all in麻辣鍋。等了十來分鐘，侍應奉上一大鍋紅色湯底。中辣的麻辣鍋，很紅，很油，麻辣香兼備，深不見底。

火鍋配料，一人選一碟肉，再來毛肚、牛肚、蔬菜籃。點解叫咁小？因為鍋入面有十幾舊好大舊既鴨紅同豆腐。(X，我明明影左舊鴨血，唔見左張相......)我們二人將鍋內所有食物都吃掉，結帳才一千元台幣—兩個字講晒，抵屌。

吃飽火鍋時間尚早，當然是去酒吧喝一杯。花蓮有幾家頗有名氣的酒吧，當中表表者是張震嶽開的谷慕滋—「谷慕滋」是張震嶽的族名。這間酒吧雖然都在花蓮金三角，但位處內街，夜晚黑墨羅有啲難搵，轉左四五次彎才到。谷慕滋門口係型既。推門入去，入面唔多人，唔係齋飲，有野食叫既–當然飽到食唔落，所以無叫。我叫了King’s Valley，她則點了Blue Lagoon，舒舒服服飲左杯就番歸休息。