真正的大隱隱於市︰本家 柴藤

數星期前閱陳姓師長面書，他說在大阪旅遊期間，在一小路發現一間270多年的鰻魚老店—本家柴藤。碰巧有數天假期，和小姐快閃遊大阪，小姐又鍾意食鰻魚飯，立刻請居日友人訂了中午12時2位。其實本家柴藤不是甚麼新鮮事物，在一些旅遊網站有提及，但店舖位置遠離購物區，加上價錢問題，香港人就算知有此店，都未必會去食。

早上起身梳洗後，離開酒店往淀屋橋方向直走，先來杯冰凍咖啡熱熱身。咖啡一點也不苦，順喉，很好喝。勝過香港Starbucks不知多少倍。

喝完繼續上路，走了五分鐘後便到本家柴藤門外。全座建築物，都是本家柴藤的領土。我們首先和地下的女職員交代我們已訂位，然後獲安排在四樓用餐。客人都是坐左塌塌米上用餐。我們點了餐後，等了很久才上菜。其實都預左，只係12點幾都未食野，真係好肚餓，店員送上鰻魚飯時，連聲抱歉，弄得我也不好意思。

我們叫了一客大阪鰻魚飯和一客柴藤流鰻魚飯午市定食，當然也需要一點酒精。但飯未到已經飲左半枝，真係等左好耐。

大阪鰻魚飯份量極大，一個人食得晒比較困難。一打開蓋，傳來一陣濃烈的香氣，是飯香加上魚香的味道。鰻魚魚肉夠彈牙，吃得小姐連聲叫好。最緊要的是，此鰻魚飯別有洞天。盒內的結構似一M記巨無霸「包肉包肉」的配置，是「魚飯魚飯」。咁多魚，咁多飯，點唔飽？

我的柴藤流鰻魚飯午市定食，這款鰻魚飯玩三食︰原味食、加蔥紫菜芥辣食和加湯變茶漬飯食。這種食鰻魚飯的方式我幾年前已食過，地點在名古屋站「ひつまぶし備長」。我覺得本家柴藤這款鰻魚飯係贏在紫菜，紫菜脆過新鮮薯片，正！鰻魚飯本身無乜分別。

兩者選一我覺得係大阪鰻魚飯正D，夠明刀明槍，大件夠香又好食。不想食咁多米飯的朋友，應該叫個大既一齊食，然後再叫個蛋卷。

其實大阪真係好多好野食，唔駛成日迷失係梅田、難波、心齋橋，買完一大餐發現無啖好食。去旅行前做下功課，發掘下隱身於小巷的美食，千萬不要悶親肚皮，才是旅行正經事。唔食飽，焉有氣力掃貨？

本家柴藤︰大阪府大阪市中央區高麗橋 2-5-2   (地鐵淀屋橋站)